الخميس، 21 أوت، 2008

عمار يا نغار !


لولاد، الظاهر والله أعلم، إلي عمار تنبز وقرر باش يعمل هجوم معاكس ويسكت الأصوات إلي إتحب تقطعلو خبزتو إلى الأبد! إي نعم! مدونة ضد الحجب وقع حجبها اليوم أثناء تناول عمار للكابوسان الصباحي ! وما ظاهرلي كان هل مرة مجرد ترعيشة !!!

حتى انتوما عورتولها ! إتحبو الراجل إولي بطال ؟ ما يزيهش السنوات العجاف إلي إتعداو عليه وقتلي فرانس 2 ما عادش عل الأرضية ؟؟؟

أنا نقترح على بقية المدونين باش كل يوم واحد يتطوع و إيحل مدونة فيها شوية احتجاجات على شوية تنديد وبكاء! هكا عمار انجم يخدم على روحو واخلينا "ننبحو رايضين" !!!

وماذا بيا كان عمار يتفاعل معانا ويعطينا عنوانو الإلكتروني و هكا إنجمو نبعثولو عنوان مدونة اليوم إلي لازمو يحجبها!

تحيين : بالنسبة للعبدلله المدونة لا تزال محجوبة وأهي صورة مرفقة كدليل ! لربما صار لها كي الفايسبوك تحجب عند عباد و عند لخرين لا !!!

هناك 10 تعليقات:

البرباش يقول...

مدونة ضد الحجب لم يقع حجبها بعد

بالله زيد ثبت قبل النشر منو هكة

Sofiene Chourabi يقول...

شنيه الاشاعات اللي تروج فيها هاذي؟ المدونة لا باس عليها. ثبّت بالقدى قبل ما تكتب حاجة..

3amrouch يقول...

اسلام نعم
كيف تقرا التعاليق الي الفوق وتشوف حدة الرد المتشنج تفهم علاش مانحبش نشارك في مدونة ضد الحجب للاسف في الوقت الراهن مازلنا بصدد البناء ومن الطبيعي انو نلقاو تصرفات هكة مردها عقلية بالية متع خمسين سنة كبت وقمع وخوف وشك.
كلها شادة قارد لبعضها
مااقواك ياعمار هههههه

islam_ayeh يقول...

ها ها ها ها ها

يا عمروش، الرسول صلى الله عليه وسلم قال : "إلتمس لأخيك سبعين عذراً"
أما فما عباد مغرومة بالرعد والصواعق، فيسع ما تمشي للتفسير المقعمز! ما نجمش حتى يسأل بالكشي إتحجبيت و رجعت! المهم، أهوكة أرفقت صورة باش إنأكد إلي ما كذبتش !!!

Bechir يقول...

J'espère seuelement que la censure n'a pas passé à l'étape où chaque fournisseur d'accès coupe des sites de sa propore initiative. Comme ça, nous aurions une hiérarchie de "3ammar"s

Tarek طارق يقول...

إسلام نعم... نتصور "برباش" يحب على الدقة و نيتو صافية... أما بالحق توة ثلاثة أيام لتالي و تقريبا في نفس النهار إلي صار فيه الحديث على قصان فايسبوك فمة شكون بعث إلي وقع قصان "ضد الحجب" من خلال ظهور صفحة 404.... زدنا ثبتنا لقينا الوضعية تشبه شيئا ما لوضعية فايسبوك توة... يعني فمة بعض الناس فقط ما ينجموش يدخلولها... مش واضح الموضوع بالضبط... و بالتالي قلنا أنا و صديق آخر بأقل شوهة حتى نشوفو شنوة الموضوع بالضبط...

islam_ayeh يقول...

يا طارق، التدخل متاع برباش كان رشيق و مقبول ! أما راني نحكي على إلي عامل تصاور متاع رعد و صواعق :-)

ما عاد تفهم شيء.. الفوضى في بلادنا وصلت حتى للحجب ! وعمار ولا إعاني من المنافسة :))))

Sofiene Chourabi يقول...

شبيه اللي عامل رعد وصواعق؟ خفت منو؟ والا خفت من الحقيقة؟
مشكلتنا أحنا في تونس الي انو نستثمرو أخطاء النظام لغايات في نفس يعقوب.
باهي الواحد يلعب أدوار البطولة، لكن ذلك ليس على حساب القضايا النبيلة والشريفة كيما قضية قمع الحريات بما فيها حجب المواقع والمدونات الالكترونية.

Werewolf يقول...

خلّينا نكونوا عمليّين و اللي يحكي على الحجب منو هكة ما فيها باس يسمي الفورنيسور متاعو... ما خيرش من إشهار سلبي يخلي المزودين يحاولوا يضغطوا على عمار... مثلا مع التوبنات لا تقص الفايسبوك و لا مدونة ضد الحجب و مع الأسف كالعادة عمار هو الوحيد اللي عندو الأجوبة متاع تساؤلاتنا الكل

islam_ayeh يقول...

@werewolf
في الحقيقة مدونة ضد الحجب، لا تزال محجوبة في الشركة إلي نخدم فيها ! وإلي في بالي مشتركة عند بلانت ! بالطبيعة، كان جا البروكسي متاع الشركة هو إلي حجبها راهو جاني تنبيه إلي دخلت صفحة محضورة !

أنا إشتراكي المنزلي عند توبنت و فايسبوك و ضد الحجب أمورهم في العنبر!

سفيان، ما فهمتش كيفاش أنا استثمرت القمع الإلكتروني متاع النظام بش نعمل بطولة ولا مكاسب سياسية ؟ ناقص كان إتقلي مشيت للسفارات الأجنبية باش نبكي و نقبض ! مشكلتنا في تونس في العباد إلي فيسع ما تبدى اتكيل في الإتهامات جزافاً...